Սույն բաժնի նպատակն է Ստեղծագործ Եվրոպա ծրագրի շահառուների հետ կիսվել բնապահպանական կայունության թեմայով համապատասխան տեղեկատվությամբ, որը կարևոր է ինչպես Մշակույթ, այնպես էլ Մեդիա բաղադրիչների բոլոր ծրագրերում և նախաձեռնություններում: 

«Կանաչ փոխակերպումը» և «Եվրոպական կանաչ գործարքը» Ստեղծագործ Եվրոպա ծրագրի հիմնական  և կարևորագույն առաջնահերթություններից մեկն է՝ հավասարության և ներառականության, թվայնացման և միջազգային համագործակցության հետ միասին։ Սա նշանակում է, որ «Ստեղծագործ Եվրոպա» ծրագրի աջակցությամբ իրականացվող բոլոր նախագծերը, առանց բացառության, պետք է անդրադառնան կանաչ փոխակերպման թեմային և փորձեն նախագծերի միջոցով որոշակի ներդրում ունենալ այդ ուղղությամբ։ 

​

Ի՞նչ ուղղություններով կամ ի՞նչ տարբերակով է հնարավոր ներկայացնել «Կանաչ փոխակերպումը» և «Եվրոպական կանաչ գործարքը» Ստեղծագործ Եվրոպա նախագծերում: 

Տարբերակ 1. Նախագիծը կարող է ուղղակիորեն ունենալ կանաչ փոխակերպումը որպես ներկայացվող նախագծի հիմնական թեմա կամ ենթաթեմա։ Օրինակ՝ կարող եք ներկայացնել այնպիսի նախագիծ, որի հիմնական նպատակներից է մշակել ցուցահանդեսների կազմակերպման կայուն ձևաչափեր կամ մշակել շրջագայությունների նոր, բնապահպանորեն պատասխանատու և կայուն մոդելներ։ Նախագծերը կարող են նաև մշակույթի միջոցով նպաստել շրջակա միջավայրի և կայունության խնդիրների բարձրաձայնմանը, օրինակ՝

• կազմակերպելով բնապահպանական իրազեկման միջոցառումներ,

• խթանելով այնպիսի արվեստի կամ մշակութային արտադրանքի ստեղծումը, որը հիմնված է կանաչ արժեքների վրա։

⚠️ Նշում․ «Եվրոպական կանաչ գործարքը» ինքնին բավարար չէ՝ որպես ծրագրի թեմա կամ ենթաթեմա։ Կայունության բաղադրիչը պետք է ինտեգրված լինի նախագծի ամբողջ կառուցվածքի մեջ, և ոչ միայն ներկայացված լինի որպես վերնագիր կամ նախագծի առանձին գործողություն։ 

​​

Տարբերակ 2. Կանաչ փոխակերպումը պարտադիր չէ դարձնել ներկայացվող նախագծի հիմնական թեմա՝ առաջնահերթության պահանջը բավարարելու համար։ Ընդունելի է նաև ներկայացնել, որ նախագիծն ինքնին կայուն է՝ անդրադառնալով կայունությանը ծրագրի իրականացման մակարդակում, փորձելով նախատեսվող  գործողություններն իրականացնել հնարավորինս կայուն և շրջակա միջավայրին ոչ վնասող տարբերակով։

Սա կարող է արտահայտվել ներքոբերյալ տարբերակներով՝

• ավիաչվերթների կրճատմամբ, երբ գործընկերները հանդիպում են․ փոխարենը հանդիպումների մի մասը կարող է կազմակերպվել առցանց ձևաչափով,

• երկաթուղային ուղևորություններին նախապատվություն տալով,

• նախագծի շրջանակներում իրականացվող գործողությունների արդյունքում ծխագազերի արտանետումների հաշվարկով և նվազեցման միջոցների մշակմամբ,

• էներգախնայողության ապահովմամբ, օրինակ՝ տեխնիկական միջոցների և նյութական ռեսուրսների արդյունավետ օգտագործմամբ։

Նախագծի կանաչ ռազմավարության մշակումը կարող է ոչ միայն բարելավել նախագծի կայունության մակարդակը, այլև խթան հանդիսանալ ծրագրին մասնակցող կազմակերպությունների կանաչ վերափոխման համար, ինչը հատկապես կարևորում և խրախուսում է Եվրոպական հանձնաժողովը։

​

Տարբերակ 3. Մեկ այլ մոտեցում է կենտրոնանալ գիտելիքի փոխանակման վրա՝ օգտագործելով գործընկեր կազմակերպությունների շրջանակը որպես հարթակ՝ լավագույն փորձի փոխանակման, կարողությունների զարգացման, կայուն աշխատանքի փորձերի և գիտելիքների տարածման համար՝ տարբեր երկրների միջև։

Այստեղ կարևոր է, որ արդյունքները հասանելի լինեն նաև այլ կազմակերպությունների համար, որպեսզի ձեր փորձառությունը չմնա միայն գործընկերների շրջանակում։ Ուստի խորհուրդ է տրվում մտածել, թե ինչպես կարող եք կիսվել ձեր գիտելիքով ավելի լայն շրջանակի հետ։ 

​​

Օգտակար նյութեր, գործիքներ և ուղեցույցներ  

Ստորև ներկայացվում են օգտակար նյութեր, գործիքներ, ուղեցույցներ և այլ փաստաթղթեր, որոնք կօգնեն ձեզ ավելի լավ հասկանալ՝ ինչպես ներկայացնել կամ ինչպես անդրադառնալ «Կանաչ փոխակերպում»-ին և «Եվրոպական կանաչ գործարք»-ին «Ստեղծագործ Եվրոպա» ծրագրի շրջանակներում: 

​

• «Կանաչ բաղադրիչների որակային գնահատում Ստեղծագործ Եվրոպա նախագծերում (Մշակույթ բաղադրիչ)» վերնագրով փաստաթուղթը ներկայացնում է, թե որ ուղղություններին է ուշադրություն դարձնում Եվրոպական հանձնաժողովը՝ նախագծերի կանաչ ռազմավարությունները գնահատելու ընթացքում։ Փաստաթուղթը ներառում է շատ արժեքավոր խորհուրդներ և գործնական հուշումներ, որոնք կարող եք օգտագործել ձեր նախագծի ձևավորման ընթացքում։ 

• "Green Producers Tool"-ը «Ստեղծագործ Եվրոպա» ծրագրի աջակցությամբ մշակված գործիք է, որը նախատեսված է փառատոններում, համերգներում, միջոցառումներում, ինչպես նաև կինո և հեռուստատեսային արտադրություններում արտանետումների չափման և նվազեցման գործընթացը հեշտացնելու համար։ Նշում․ գործիքը անվճար չէ։

• New European Bauhaus գործիքը, որը ներկայացնում է, թե ինչպես կարելի է աշխատել Նոր եվրոպական Բաուհաուս (New European Bauhaus) նախաձեռնության երեք հիմնական սկզբունքների ուղղությամբ՝ էսթետիկա, կայունություն և ներառականություն։ 

• "European Circular Economy Stakeholder Platform"-ը Եվրոպական հարթակ՝ է  նվիրված շրջանաձև տնտեսության անցման գործընթացին։ Ներկայացնում է գործիքներ, լավագույն փորձի օրինակներ և տեղեկատվություն տարբեր ոլորտների համար՝ ներառյալ մշակույթը։

• Future Festival Tools. անվճար գործիքակազմ փառատոնների և այլ մեծածավալ միջոցառումների համար, որը ներառում է՝ ինքնագնահատման գործիք, անվճար առցանց ուսումնական դասընթաց, լավագույն փորձի օրինակներ: 

• «Եվրոպական կանաչ գործարք» (European Green Deal). Եվրոպական հանձնաժողովի քաղաքական նախաձեռնությունների փաթեթ է, որի նպատակն է խթանել կանաչ փոխակերպումը։ Վերջինս Եվրոպական հանձնաժողովի 2019–2024 թվականների վեց հիմնական քաղաքական առաջնահերթություններից մեկն է։ Ձեր նախագիծը մշակելիս կարևոր է ծանոթ լինել սույն փաստաթղթի հիմնական սկզբունքներին, քանի որ դրանք կարող են ուղղորդել Ձեզ նախագծի շրջանակներում և բարձրացնել դրա համապատասխանությունը ԵՄ առաջնահերթություններին։ 

• Greening of the Creative Europe Programme. 2023թ. զեկույցը ներկայացնում է խորքային պատկերացում՝ ինչու և ինչպես կարող է «Ստեղծագործ Եվրոպա» ծրագիրը և դրա կողմից աջակցվող նախագծերը նպաստել կանաչ փոխակերպմանը։ Զեկույցի ամբողջական տարբերակը հասանելի է այստեղ։
  Ներշնչում և խորհուրդներ կոնկրետ գործողությունների համար կարող եք գտնել զեկույցի ենթաբաժնում "The Good Environmental Practices Guide" ենթաբաժնում: 

• New European Bauhaus (NEB). վերջինս ԵՄ նախաձեռնություն է, որն ուսումնասիրում է, թե ինչպես կարող է կանաչ փոխակերպումը դառնալ մարդկանց կյանքի մի բաղադրիչ՝ անդրադառնալով նաև արվեստի և մշակույթի դերին այդ գործընթացում։ NEB-ը բացահայտորեն հիշատակվում է մի շարք ֆինանսավորման ծրագրերի նկարագրություններում, և բնականաբար խորհուրդ է տրվում անդրադառնալ սույն նախաձեռնությանը ձեր նախագծի շրջանակներում: Կարող եք ծանոթանալ սույն ձեռնարկին, որը ներկայացնում է նախաձեռնության սկզբունքները և առաջարկում է օգտակար խորհուրդներ՝ ինչպես NEB-ը ներառել ձեր նախագծում արդեն սկզբնական փուլում: 

• Creative Europe 2014-2020, Gender Equality, Sustainability and Digitalisation. սույն հրապարակումը կփոխանցի ձեզ որոշակի գաղափարներ՝ ինչպես կարող եք աշխատել կայունության ուղղությամբ «Ստեղծագործ Եվրոպա» ծրագրի շրջանակում: Հրապարակումը ներկայացնում է 2014–2020թթ. ծրագրային փուլի նախագծերի ու նախաձեռնությունների համադրական վերլուծությունը, որոնք կենտրոնանում են կայունության, գենդերային հավասարության և թվայնացման վրա։  

• The Ultimate Cookbook for Cultural Managers: The EU Green Deal and Live Performance Organisations. սույն ուղեցույցը ներկայացնում է ԵՄ քաղաքական շրջանակի տրամաբանությունը և հիմնավորումը կանաչ փոխակերպման ուղղությամբ, ինչպես նաև դրա կապը եվրոպական բեմարվեստի և երաժշտական հատվածի հետ։ Ուղեցույցը մշակվել է "Pearle" կազմակերպության և Եվրոպական փառատոների ասոցիացիայի (EFA) համատեղությամբ։

• Creatives Unite: Greening. այս Եվրոպական առցանց հարթակն առաջարկում է տեղեկատվություն և գործիքներ՝ ուղղված Եվրոպայում մշակութային կյանքի զարգացմանը։ Հարթակում կա թեմատիկ էջ՝ նվիրված կանաչ փոխակերպմանը, որտեղ ներկայացված է արդի և կարևոր տեղեկատվություն՝ կապված եվրոպական մշակութային ոլորտների գործունեության և  կլիմայի հետ: 

​

​

​

​

​